Dagur íslenskrar náttúru verður haldinn hátíðlegur í annað sinn sunnudaginn 16. september næstkomandi.
Nokkur félagasamtök, þ.m.t. Landvernd, efna til Hjólaævintýris fjölskyldunnar í tilefni dagsins, sem jafnframt markar upphaf Evrópsku samgönguvikunnar. Ríkuleg fræðsla um lífríki og náttúrufyrirbæri er í boði á tíu stöðum á þremur hjólaleiðum. Endað verður á Árbæjarsafni þar sem umhverfis- og auðlindaráðuneytið ásamt Reykjavíkurborg standa fyrir hátíðardagskrá.
Leið nr. 3 liggur frá Ástjörn í Hafnarfirði um Kópavog þar sem stansað verður við Þinghól kl. 12:25. Við Þinghól munu Ármann Kr. Ólafsson bæjarstjóri taka á móti hjólreiðamönnum og setja vikuna formlega og Hilmar J. Malmquist, forstöðumaður Nátturufræðistofu Kópavogs, mun segja frá fjörulífríki og fornri mannvist í voginum. Hjólalestin mun síðan halda áfram kl. 12:45 áleiðis í Árbæjarsafn.
Tilurð Dags íslenskrar náttúru má rekja til ákvörðunar ríkisstjórnar Íslands um að tileinka íslenskri náttúru sérstakan heiðursdag til að undirstrika mikilvægi hennar. Dagurinn sem valinn var er 16. september, fæðingardagur Ómars Ragnarssonar, en Ómar hefur verið afar ötull við að opna augu landsmanna fyrir þeim auðæfum sem felast í náttúru landsins og mikilvægi þess að vernda hana og varðveita.
27
nóv
