Í sumar verður haldið 18. sumarnámskeiðið á vegum Náttúrufræðistofunnar fyrir krakka 10–12 ára. Það verður haldið 13.–16. júní og að venju mæta krakkarnir kl. 10:00 vel gallaðir og nestaðir en námskeiðið stendur alla jafna til kl. 15:00. Farið verður til sýnatöku í náttúrunni og þær lífverur sem fyrir augu ber verða greindar og skoðaðar. Haldin verður nákvæm dagbók að sið vísindamanna. Að þessu sinni ber svo við að náttúrufræðingurinn Jane Goodall sem þekktust er fyrir rannsóknir sínar á atferli simpansa er á landinu. Á viðburði í Háskólabíói fá þátttakendur í námskeiðinu að greina henni frá því hvað verið er að sýsla á námskeiðinu.
Jane Morris Goodall (fædd Valerie Jane Morris-Goodall 3. apríl 1934) er breskur dýrafræðingur, fremdardýrafræðingur og mannfræðingur og sérstakur sendiherra Sameinuðu þjóðanna fyrir friði. Hún er talin einn mesti sérfræðingur heimsins um simpansa og er þekktust fyrir 45 ára langan rannsóknarferil sinn á félagslegri hegðun og fjölskylduböndum villtra simpansa í Gombe Stream National Park í Tansaníu. Hún stofnaði Jane Goodall-stofnunina og hefur unnið mikið að verndun og velferð villtra dýra. Goodall hefur gefið út mikinn fjölda bóka (https://is.wikipedia.org/wiki/Jane_Goodall). Sjá einnig hér.
Sumarnámskeiðið stendur alla jafna frá kl. 10:00–15:00 en miðvikudaginn 15. júní verður farið á sérstaka uppákomu í Háskólabíói þar sem þátttakendur í námskeiðinu hitta Jane, fræða hana um hvað numið hefur verið á námskeiðinu og fræðast af henni um margt sem hún kann að miðla. Fastlega má gera ráð fyrir að námskeiðið taki heldur lengri tíma þennan dag. Í Háskólabíó mæta einnig aðrir krakkar, t.d. úr Háskóla unga fólksins, og segja frá verkefnum sínum.
