Aðventuhátíð í Kópavogi verður haldin með pompi og pragt, laugardaginn 30. nóvember. Ljósin á jólatré Kópavogsbæjar við menningarhúsin verða tendruð við hátíðlega athöfn þar sem jólasveinar bregða á leik, dansað verður í kringum jólatréð og fjöldi krakka í Kópavogi blása í lúðra og syngja falleg og skemmtileg jólalög.
Boðið verður upp á fjölbreyttar aðventusmiðjur frá klukkan 15. Pólsk brúðusmiðja, fóðurkönglagerð fyrir fugla, jólagjafasmiðjur, jólatónlist og lesið verður upp úr jóladagatali sem Eygló Jónsdóttir rithöfundur skrifaði upp úr hugmyndum barna í Kópavogi.
Systir jólasveinanna mætir með fullt af tröllafötum úr Grýluhelli og býður mannabörnum að klæða sig sem tröllabörn. Tröllastelpa kennir krökkum á öllum aldri að dansa við dillandi jólalög. Og að sjálfsögðu mæta jólasveinar á svæðið og leiða dans í kringum jólatréð ásamt vinkonu sinni henni Rófu.
Nemendur úr Tónlistarskóla Kópavogs flytja fallega jólatónlist á aðventutónleikum á bókasafninu. Í forsal Salarins mun bæjarlistamaður Kópavogsbæjar, Kristofer Rodriguez Svönuson, trommu- og slagverksleikari bjóða upp á jólajazz ásamt Daníel Helgasyni gítarleikara og Hannesi Helgasyni hljómborðsleikara.
Verið öll hjartanlega velkomin.
Dagskrá:
Bókasafn Kópavogs
15:00-16:30 Skreytum jólatré Gloríu
15:00-16:30 Jóladýr og jólaverur – föndur
15:00-16:30 Jólagjafasmiðja 11+ – þrívíddarpennar og perluarmbönd
15:15 / 15:45 / 16:15 Jólasögustund með Eygló Jónsdóttur
16:00 Jólatónleikar með nemendum úr Tónlistarskóla Kópavogs
Jólaratleikur og innpökkunarstöð á opnunartíma safnsins.
Gerðarsafn
14:00-16:00 Pólsk brúðusmiðja með Styrmi Erni Guðmundssyni og Agötu Mickiewicz
15:00 -17:00 Sunna Ben þeytir skífum á Krónikunni.
Sýningarnar Gerður grunnsýning, Óstöðugt land og Parabóla eru opnar.
Náttúrufræðistofa
15:00-16:30 Fóðurkönglagerð fyrir fugla
Grunnsýning Náttúrufræðistofu verður opin.
Salurinn
15:00 – 15:40
Jólajazz bæjarlistamannsins
Kristófer Rodriguez Svönuson á trommur og slagverk, Daníel Helgason á gítar og Hannes-Helgaon á hljómborð.
Á útisvæði
Frá klukkan 15 – 16:30 verður hægt að prófa að klæða sig í alls kyns skemmtileg tröllaföt úr jólalundi og læra jóladansa.
16:30 Skólahljómsveit Kópavogs flytur jólalega hátíðarsveiflu undir stjórn Össurar Geirssonar.
16:55 Kórar Smáraskóla og Hörðuvallaskóla flytja jólalög undir stjórn Ástu Magnúsdóttur og Ásu Valgerðar Sigurðardóttur.
17:00 Jólaljósin tendruð. Jólaverur úr Jólalundi stíga á stokk og slegið verður upp dansleik í kringum jólatréð.
