Safnið - Náttúrusafn Kópavogs

Náttúrusafn Kópavogs er fjölskylduvænt safn þar sem finna má lifandi fræðslu um lífríki Jarðar. Markmið Náttúrusafnins er að kveikja áhuga, forvitni og virðingu gagnvart náttúrulega heiminum sem manneskjan tilheyrir. Aðgangur er ókeypis.

Skeldýrasafn Jóns Bogasonar

Upphafleg stoðgrind safneignar Náttúrusafnsins er skeldýrasafn Jóns Bogasonar. Jón Bogason var listhneigður og ötull náttúrufræðingur. Á sínum líftíma uppgötvaði hann nokkur hundruð tegundir dýra sem höfðu ekki fundist áður við strendur Íslands. Einnig uppgötvaði hann nokkrar tegundir sem höfðu ekki fundist áður í heiminum.

Einn merkasti fundur Jóns var skelin Micropilina Minuta. Um er að ræða skel sem vísindasamfélagið taldi löngu útdauða en þrjú hundruð og fimmtíu milljón ára gamlir steingervingar hafa fundist af skelinni. Jón fann átta lifandi skeldýr sem tilheyrðu þessari tegund á Íslandi.

Nokkrar tegundir skeldýra hafa verið nefndar í höfuðið á Jóni Bogasyni. Þar á meðal er kuðungurinn Bogabrynja (Xeno donta bogasoni) og skelin Bogaskjöldur (Bogasonia volutoides) Þá var heil ættkvísl skeldýra nefnd eftir honum - einskjöldungategund sem ber latneska heitið Bogasonia.

Árið 1983 gaf Jón Bogason skeldýrasafn sitt til Kópavogsbæjar, sem nýtti safnið til að stofna Náttúrufræðistofu Kópavogs.

Náttúrufræðistofa Kópavogs var stofnuð í desember árið 1983.

Flutningur

Í maí 2002 fluttist Náttúrufræðistofa Kópavogs í nýbyggt safnahús að Hamraborg 6a og deilir því með Bókasafni Kópavogs. Húsið er sambyggt Salnum í Kópavogi, við hlið Gerðarsafns. Staðsetningin er sérlega góð m.t.t. almenningssamgangna, en aðeins eru fáein skref að skiptistöðinni við Hamraborg.

Húsnæði Náttúrufræðistofunnar er hið fyrsta á landinu sem er hannað frá grunni fyrir náttúrufræðisafn og gerbreytti sýningaraðstöðu á safnmunum og stórbætti möguleika á allri þjónustu.

Starfsemi

Hér áður fyrr voru rannsóknir stór hluti af starfsemi Náttúrufræðistofunnar, einkum á sviði vatnavistfræði. Verkefnin hafa verið af öllum stærðum, stundum í samvinnu við aðrar rannsóknarstofnanir bæði innanlands og utan. Sum verkefni hafa verið unnin fyrir eigin reikning en önnur hafa hlotið styrki s.s. frá Rannís, ESB og Norrænu ráðherranefndinni. Einnig hefur verið nokkuð um útseld verkefni m.a. í tengslum við vatnaflokkun, mat á umhverfisáhrifum og skipulagsmál sveitarfélaga á höfuðborgarsvæðinu.

Ný sýning

Í maí 2024 var ný og stórlega endurbætt sýning opnuð í safninu undir heitinu Brot úr ævi Jarðar. Í dag hverfist starfsemi Náttúrusafns Kópavogs því um metnaðarfulla fræðslu til barna og ungmenna. Skólahópar og auðvitað allir aðrir eru hjartanlega velkomin í heimsókn.