Safnið
Náttúrusafn Kópavogs er fjölskylduvænt safn þar sem finna má lifandi fræðslu um lífríki Jarðar. Markmið Náttúrusafnins er að kveikja áhuga, forvitni og virðingu gagnvart náttúrulega heiminum sem manneskjan tilheyrir. Aðgangur er ókeypis.
Skeldýrasafn Jóns Bogasonar
Upphafleg stoðgrind safneignar Náttúrusafnsins er skeldýrasafn Jóns Bogasonar. Jón Bogason var listhneigður og ötull náttúrufræðingur. Á sínum líftíma uppgötvaði hann nokkur hundruð tegundir dýra sem höfðu ekki fundist áður við strendur Íslands. Einnig uppgötvaði hann nokkrar tegundir sem höfðu ekki fundist áður í heiminum.
Einn merkasti fundur Jóns var skelin Micropilina Minuta. Um er að ræða skel sem vísindasamfélagið taldi löngu útdauða en þrjú hundruð og fimmtíu milljón ára gamlir steingervingar hafa fundist af skelinni. Jón fann átta lifandi skeldýr sem tilheyrðu þessari tegund á Íslandi.
Nokkrar tegundir skeldýra hafa verið nefndar í höfuðið á Jóni Bogasyni. Þar á meðal er kuðungurinn Bogabrynja (Xeno donta bogasoni) og skelin Bogaskjöldur (Bogasonia volutoides) Þá var heil ættkvísl skeldýra nefnd eftir honum - einskjöldungategund sem ber latneska heitið Bogasonia.
Árið 1983 gaf Jón Bogason skeldýrasafn sitt til Kópavogsbæjar, sem nýtti safnið til að stofna Náttúrufræðistofu Kópavogs.
.png&w=3840&q=75)
Flutningur
Í maí 2002 fluttist Náttúrufræðistofa Kópavogs í Hamraborgina og jókst þá samstarf með bæði Bókasafni Kópavogs og Gerðarsafni. Starfsemin hefur því vaxið í takt við tímans tönn og gegnir lykilhlutverki í þeirri fjölbreyttu menningarstarfsemi sem má finna í Hamraborginni í dag.
Starfsemi
Hér áður fyrr voru rannsóknir stór hluti af starfsemi Náttúrufræðistofunnar, einkum á sviði vatnavistfræði. Verkefnin hafa verið af öllum stærðum, stundum í samvinnu við aðrar rannsóknarstofnanir bæði innanlands og utan. Sum verkefni hafa verið unnin fyrir eigin reikning en önnur hafa hlotið styrki s.s. frá Rannís, ESB og Norrænu ráðherranefndinni. Einnig hefur verið nokkuð um útseld verkefni m.a. í tengslum við vatnaflokkun, mat á umhverfisáhrifum og skipulagsmál sveitarfélaga á höfuðborgarsvæðinu.
Ný sýning
Í maí 2024 var ný og stórlega endurbætt sýning opnuð í safninu undir heitinu Brot úr ævi Jarðar.
Á sýningunni Brot úr ævi Jarðar í Náttúrusafni Kópavogs fara gestir í ferðalag um tíma og rúm, sólkerfið okkar og sögu Jarðar og skoða merkileg skordýr, fiska, fugla og framandi steina. Sýningin veitir innsýn í sögu plánetunnar okkar, þróun lífsins og samspil dýra og plantna við umhverfið og hvert annað. Líkt og náttúran þá mun sýningin þróast og breytast með tímanum jafnvel með óvæntum stökkbreytingum.
