Haftyrðill í ógöngum

10. janúar 2019

Krakkar á leikskólanum Kópasteini rákust á fremur lítinn og dálítið sérkennilegan fugl, sem virtist eiga í einhverjum vandræðum. Búið var um fuglinn í skókassa og síðan rölt með hann til okkar á Náttúrufræðistofunni, til að fá úr því skorið hvað þarna væri á ferðinni.

Um var að ræða haftyrðil og virtist hann vera við þokkalegustu heilsu. Því var ákveðið að hópurinn færi með hann niður í Fossvog og sleppti honum þar, enda haftyrðlar eindregnir sjófuglar sem geta lent í hinum mestu ógöngum á landi.

Haftyrðill telst til hóps svokallaðra svartfugla ásamt fuglum eins og álku, langvíu, stuttnefju, lunda og teistu. Haftyrðlar eru hánorrænir varpfuglar sem að sumarlagi halda til við heimskautalönd á borð við Grænland og Svalbarða, en hafa vetursetu á norðanverðu Atlantshafi, þar með talið við Ísland.

Hin rysjótta veðrátta undanfarið virðist hafa valdið því að þessa smávöxnu sjófugla hefur hrakið upp á land og er þetta þriðji fuglinn frá áramótum sem við höfum fregnir af. Hinir tveir fundust dauðir í húsagörðum, annar í Kópavogi en hinn í Staðarhverfi í Grafarvogi.