Kópavogsdagar 2010

03. maí 2010

mynd213.pngKópavogsdagar verða settir laugardaginn 8. maí næstkomandi. Að venju er boðið upp á fjölbreytta menningardagskrá. Náttúrufræðistofa Kópavogs lætur ekki sitt eftir liggja á Kópavogsdögum og býður upp á Freyju fisdægru, ævintýri fyrir krakka á leikskólaaldri, Litlar flugur – stórt hlutverk, fyrirlestur um rannsóknir á rykmýi, Fljúga hvítu fiðrildin, sem er yfirlitssýning á flækingsskordýrum, og Af lifun sem er sýning á verkum listamannsins Magnúsar Árnasonar.

Dagskrá Kópavogsdaga árið 2010 hjá Náttúrufræðistofunni.

mynd209.jpgFljúga hvítu fiðrildin: Laugardaginn 8. maí kl. 13:00 Staður: Náttúrufræðistofa Kópavogs. Opnun á sýningu um flækingsfiðrildi á Íslandi í anddyri Náttúrufræðistofunnar. Sýndar verða helstu flækingstegundirnar og upplýsingar veittar um uppruna og líffræði þessara skrautlegu skammtímagesta landsins. Sýningin stendur fram á haust.

mynd210.jpg

Freyja fisdægra: Mánudag 10. maí–14. maí og 17.–21. maí kl. 10:00 og 11:00. Staður: Náttúrufræðistofa og Bókasafn Kópavogs. Ævintýri sniðið fyrir börn á leikskólaaldri um litlar flugur og líf þeirra. Fróðleikur í máli og myndum fluttur í Kórnum og barnadeild Bókasafnsins. Flutt tvisvar á dag, kl. 10:00 og 11:00. Ævintýrið verður einnig haldið vikuna 17. til 21. maí á sama tíma. 

Litlar flugur – stórt hlutverk: Miðvikudaginn 12. maí kl. 12:15–13:00 Staður: Náttúrufræðistofa Kópavogs, Kórinn, fyrirlestrarsalur. Þóra Hrafnsdóttir líffræðingur á Náttúrufræðistofunni flytur erindi um rykmý á Íslandi og byggir á eigin rannsóknum og gögnum í fórum Náttúrufræðistofunnar. Fjallað verður um rykmý á Íslandi en þessi hópur skordýra, þrátt fyrir að skipa smávöxnum lífverum, gegnir lykilhlutverki í orkubúskap og vistfræði straum- og stöðuvatna á landinu. Erindið hefst kl 12:15.

mynd211.jpg

Af lifun: Laugardaginn 15. maí kl. 15:00. Staður: Náttúrufræðistofa Kópavogs. Opnun á sýningu Magnúsar Árnasonar í Náttúrufræðistofu Kópavogs. Listir og vísindi eru ólíkar en þó skyldar greinar og hefur saga þeirra oft á tíðum verið samtvinnuð. Á sýningunni eru könnuð tengsl þessara tveggja greina þar sem unnið er út frá sýningarsafni og starfsemi Náttúrufræðistofunnar og veitt innsýn í fegurð hins vísindalega rannsóknarferlis. Með því að varpa ljósi á skörun þessara tveggja greina er ætlað að beina sjónum okkar að flóknu samlífi náttúrunnar og hinu manngerða, staðreyndum sögunnar og skáldskaparins. Sýningarstjórn er í höndum Kristínar Dagmar Jóhannesdóttur og Hilmars J. Malmquist. Sýningin stendur til 15. september.

mynd212.jpg